सुनना भैरा – गोठिया कोंदा “कोंदा-भैरा के गोठ” – सुशील भोले
जांजगीर फर्स्ट न्यूज़। हमर रायपुर के टूरी हटरी वाले भगवान जगन्नाथ खातिर ए बछर नवा रथ बने हे जी भैरा.. भगवान ह ए बछर के यात्रा ल इही नवा रथ म करही।
ए तो बने बात आय जी कोंदा.. तोला सुरता हे ना पहिली जब हमन रथयात्रा के दिन रथ ल तीरे बर जावन त कइसे चर्र-चर्र बाजत अलकर बानी के जनावय त कभू अरझे असन हो जावय।
हव.. ओकरे सेती वो चालीस बछर जुन्ना रथ ल बलदत हें. अभी के नवा रथ म स्टेयरिंग के संग ब्रेक घलो हावय, जेकर ले एला भीड़ म घलो रेंगाय म सोहलियत परही. नवा रथ ल हबीब नॉव के एक मुस्लिम मनखे ह अपन बेटा रियाज संग मिल के बनाय हे. ओकर कहना हे- रथ ल बनाय खातिर वो ह कोनो किसम के मोलभाव नइ करे हे, मंदिर समिति डहार ले बंद लिफाफा म जतका दे दिए जाथे, वो ह श्रद्धा के साथ उहीच ला झोंक लेथे।
वाह भई ए तो सुग्घर बात आय.. कोनो धरम के मनखे होय ईश्वरीय आस्था ऊपर तो श्रद्धा भाव होना चाही.. इही तो हमर देश के सांस्कृतिक भाईचारा के मयारुक रूप आय।
