कुछ पुटू मन जहरीला होथें, चेतलग रहव

सुनना भैरा – गोठिया कोंदा “कोंदा-भैरा के गोठ” – सुशील भोले

जांजगीर फर्स्ट न्यूज़। -अभी बरखा के मौसम म बादर गरजथे तहाँ ले गजब के पुटू फूटथे जी भैरा, एकर मन के साग रांध के खाए म गजबेच आनंद आथे संगी.
-हहो जी कोंदा सही काहत हस.. ए प्राकृतिक मशरूम जेला पुटू, पिहरी आदि कहिथन ए मन गजब के स्वादिष्ट होए के संगे-संग जबर पुष्टई घलो होथे, फेर एमा के कतकों मन जहरीला घलो होथें, तेकरो चेत राखे बर लागथे.
-अच्छा.. जहरीला घलो होथे?
-हहो.. अभी हमर छत्तीसगढ़ म पाए जाने वाला पुटू पिहरी मन ऊपर शोध करे वैज्ञानिक के कहना हे- हमर छत्तीसगढ़ म कुल 28 किसम के मशरूम मिलथे, जेमा के 4 किसम के पुटू मन जहरीला होथे. ए पुटू मन लाल, पीला, नीला, हरा, बैगनी, नारंगी आदि रंग के दिखत होही त वोला बिल्कुल नइ खाना चाही. अइसने कहूँ पुटू के छतरी चेपटा असन जनावय तभो वोला नइ खाना चाही.
-ठउका बताए संगी.. घर के मन अभी खेत-खार म जेन पुटू ह दिखथे, उही ल धर लेथें.. उनला चेताय बर लागही.