चुनई के झरते बिजली के झटका

सुनना भैरा – गोठिया कोंदा “कोंदा-भैरा के गोठ” – सुशील भोले

जांजगीर फर्स्ट न्यूज़। चुनई के झरते बिजली के झटका लगगे जी भैरा।

महूं ल अइसने खबर मिले हे जी कोंदा के घरेलू बिजली म 20 पइसा प्रति यूनिट के बढ़ोत्तरी करे गे हवय।

हव जी.. फेर किसान मनला तो बनेच झटका दे हावंय कृषि बिजली म तो 25 पइसा के बढ़ोत्तरी होय हे, जबकि पोहा मुरमुरा मिल वाले मनला 5 पइसा के छूट दिए।

अचरज के बात आय संगी.. किसानी बर 25 पइसा बढ़ोत्तरी अउ ओकर उपज ले बने पोहा मुरमुरा बर 5 पइसा के छूट!

चुनाव झरे के बाद ही तो सरकार के असली चेहरा दिखथे संगी.. कोन अपन अउ कोन बिरान!

हव जी.. चाहे कोनो दल के सरकार होय, चरित्तर सबके एके बरोबर होथे.. चुनाव के होवत ले मोहलो मोहलो अउ चुनाव झरिस तहाँ ले दंदोरो पटको.. लूटो झटको।