सुनना भैरा – गोठिया कोंदा “कोंदा-भैरा के गोठ” – सुशील भोले
जांजगीर फर्स्ट न्यूज़। -गोल्डन बुक ऑफ वर्ल्ड रिकॉर्ड के नॉव ले के आजकाल कविता कहानी के भारी किताब छपत हे जी भैरा.
-हव जी कोंदा एक-दू झन कवि किसम के लोगन मनला गोल्डन बुक के नॉव लेके पइसा संग रचना माँगत महूं देखे हावौं.
-फेर तैं जानत हावस संगी पाछू छै बछर ले पूरा देश भर म गोल्डन बुक ऑफ वर्ल्ड रिकॉर्ड के नॉव म जेन प्रमाण पत्र बॉंटे जावत हे, ए ह न तो कोनो अंतर्राष्ट्रीय संस्था आय, न एकर विदेश म कोनो कार्यालय हे.
-अच्छा.. अइसे हे का?
-हव.. इंदौर पुलिस के क्राइम ब्रांच ह अभी एकर खुलासा करे हे, वोकर कहना हे के गोल्डन बुक ऑफ वर्ल्ड रिकॉर्ड के नॉव म पइसा लेके प्रमाण पत्र बॉंटे जावत हे, असल म एकर पूरा के पूरा फर्जी कारोबार चलाए जावत हे. पंजीयन के नॉव म जइसे दुकान आदि के पंजीयन करवाए जाथे, बस ततके भर एकर बर करवाए गे हवय. एकर वेबसाइट म जेन विदेशी संस्थापक के नॉव अउ पता बताय गे हे, वो सब फर्जी हे.
-वाह भई.. फेर लोगन तो एकर प्रमाण पत्र ल देखा-देखा के अभी भारी मगन होवत हें.
-वो बपरा मन सब भरम संग ठगी के शिकार हें संगी.
