सुनना भैरा – गोठिया कोंदा “कोंदा-भैरा के गोठ” – सुशील भोले
जांजगीर फर्स्ट न्यूज़। मोला ए समझ म नइ आवय जी भैरा के अस्पताल के साफ सफाई अउ उहाँ के पुरुष वार्ड के बिस्तर म जोफ्फा के जोफ्फा रेंगत कॉकरोच मन ले मुक्ति खातिर आचार संहिता के खुले के अगोरा कइसे करे जा सकथे?
भारी अचरज के बात आय जी कोंदा.. अस्पताल ले कॉकरोच मनला खेदारे बर भला आचार संहिता खुले के का संबंध हे? अस्पताल के साफ सफाई अउ रोग-राई ले मुक्ति के व्यवस्था तो सामान्य प्रक्रिया आय।
हव.. फेर बैकुंठपुर जिला अस्पताल के मुख्य चिकित्सा अधिकारी ह जब पत्रकार मन एकर संबंध म पूछिन त अइसने जवाब दिस.. सबले ताज्जुब के बात तो ए आय- जब इहाँ के स्वास्थ्य मंत्री संग ओकर गोठ-बात कराए गिस तभो चिकित्सा अधिकारी के अइसने च जवाब रिहिसे!
वाह भई.. अपन खामी ल लुकाय के अइसन घेक्खर घटना अउ अधिकारी हमन कहूँ नइ देखे रेहेन!
