सुनना भैरा – गोठिया कोंदा “कोंदा-भैरा के गोठ” – सुशील भोले
जांजगीर फर्स्ट न्यूज़। -अब गणपति महराज के परघनी के दिन आवत हे जी भैरा.
-हव जी कोंदा.. जगा-जगा कलाकार मन उंकर प्रतिरूप ल सिरजाए म भीड़े हें.
-सही आय जी अब तो हमर छत्तीसगढ़ के कलाकार मन के सिरजाय मूर्ति मन राज के सीमा ले नहाक के उत्तर प्रदेश, बिहार अउ हैदराबाद जइसन जगा मन म घलो जाए लगे हे.
-हव जी सही आय इहाँ के राजनांदगाँव जिला के गाँव थनौद के कलाकार मन तो गजबेच मनमोहक मूर्ति बनाथें, एकरे सेती उहाँ महीना भर पहिली ले मूर्ति देखइया मन के मेला लग जाथे. रायपुर, दुर्ग, भिलाई अउ बालोद तक तो उहाँ मूर्ति पहिलीच ले जावत रिहिसे.
सही आय जी महू सुने रेहेंव.. इंटरनेट के आए ले यूट्यूब ह ए बुता म बनेच बूता करत हे. कतकों यूट्यूबर मन ए गाँव म आथें अउ कलाकार मन के इंटरव्यू लेवत रहिथें एकरे सेती तो आज ए गाँव के चिन्हारी चारों मुड़ा बगरत जावत हे. ए गाँव म मूर्ति बनई ह कुटीर उद्योग के रूप धर लिए हे.
