नॉव के गरू बढ़ाय बर नवा उदिम

सुनना भैरा – गोठिया कोंदा “कोंदा-भैरा के गोठ” – सुशील भोले
जांजगीर फर्स्ट न्यूज़। -लोगन आजकाल अपन नॉव के गरू ल बढ़ाय खातिर का-का नवा पद सिरजा डारथें जी भैरा.
-कइसे गढ़न के जी कोंदा?
-अभी एक झन लइका के फटफटी ल देखत रेहेंव, वोमा ‘छाया विधायक’ फलाना लिखाय रिहिसे.
-हमन विधायक या विधायक प्रतिनिधि ल जानत रेहेन गा, फेर अब ए नवा ह का आय ते?
-हव जी.. अरे जादा हो जाय त विधायक पति ल घलो अमर डारत रेहेन.. सरपंच पति असन.
-हव जी सिरतोन आय.
-अउ जब मैं वो छाया विधायक के फटफटी म चघे लइका ल पूछेंव त वो का बताइस जानथस?
-बताना भई!
-वो बताइस के वो ह एक पइत विधानसभा के निर्दलीय चुनाव लड़े रिहिसे.. भले जमानत नइ बॉंचे रिहिसे, फेर विधायक के चुनाव लड़े के सेती ‘छाया विधायक’ तो बनीच गे ना?
-वाह भई गजब हे.. फेर मैं गुनथौं संगी, के पंच, पार्षद ले लेके राष्ट्रपति तक के चुनाव लड़े के उदिम करइया धरती पकड़ जइसन मनला तब अपन नॉव संग म का-का पदवी लिखवाना चाही?