सुनना भैरा – गोठिया कोंदा “कोंदा-भैरा के गोठ” – सुशील भोले
जांजगीर फर्स्ट न्यूज़। ए बखत के नौ तपा ह बिजली विभाग के मेहरबानी के सेती अट्ठारा टप्पा बरोबर जनावत हे जी भैरा।
सिरतोन कहे जी कोंदा.. कभू कभू तो छत्तीसगढ़ के पूरा छत्तीस टप्पा बरोबर घलो जनाथे, तेकर सेती अकबकासी असन हो जथे संगी।
तोरो कहना सहीच आय.. आजे देख ले बिहनिया ले मंझनिया के होवत ले तीन पइत बिजली रानी ह कती मुड़ा लजावत चल दे रिहिसे।
झन पूछ संगी… रतिहा बेरा तो अउ अतलंग करथे, आजे जइसे बियारी कर के सूतेंव.. वो ह फेर गोल होगे, खटिया म सूतेच सूते पछीना म नहा डारे रेहेंव.. जम्मो जठना मन निचोय के लइक होगे रिहिसे।
हव भई.. भारी करलई हे, तभो ले सरकार ह हमर इहाँ बिजली ह सरप्लस हे कहिथे!
हव ना.. अउ जब हमर राजधानी के अइसन हाल हे, त दुरिहा के गाँव गंवई मन के का हाल होही?
