ओलंपिक के मैदान ले बस्तर तक बहादुर बेटी मन के सोर

सुनना भैरा – गोठिया कोंदा “कोंदा-भैरा के गोठ” – सुशील भोले

जांजगीर फर्स्ट न्यूज़। -ओलंपिक के मैदान ले लेके नक्सल‌ प्रभावित बस्तर तक ले बेटी मन के बहादुरी अउ सफलता के सोर सुनावत हे जी भैरा.
   -हव जी कोंदा.. महूं ल अइसने गम मिले हे, नक्सल प्रभावित झारा गाँव म बीते रतिहा आठ झन हथियार धरे नक्सली मन 50 बछर के सोमधर कोर्राम ऊपर टंगिया ले हमला कर दिए रिहिन हें, तभे वोकर 17 बछर के बेटी सुशीला वो मेर हबरगे अउ नक्सली मन संग भीड़ गे. वो ह नक्सली के हाथ ले टंगिया ल नंगा के चिल्लाए लागिस. वोकर आवाज ल सुन के परोसी मन आए लगिन, त तहाँ ले नक्सली मन भाग गीन.
   -ए तो होनच हे संगी.. मुंह म कपड़ा तोप के पहुंचे  नक्सली मन कोनो भी सिद्धांत के पोषक नइ हो सकय, ए मन सिरिफ डर पैदा कर के अपन धंधा चलावत हें. लोगन सुशीला नोनी कस एकर मन के आगू म बहादुरी के साथ खड़ा होवत जाहीं, त इन खुदे तिरिया जाहीं.