सुनना भैरा – गोठिया कोंदा “कोंदा-भैरा के गोठ” – सुशील भोले
जांजगीर फर्स्ट न्यूज़। -अभी हरियाणा के स्कूल शिक्षा निदेशालय ह एक आदेश निकाले हे जी भैरा.. जेकर मुताबिक अवइया स्वतंत्रता दिवस ले उहाँ के जम्मो स्कूल मन म लइका मनला एक-दूसर ल अभिवादन करत बेरा गुड मॉर्निंग के बलदा ‘जय हिंद’ कहे बर लागही.
-ए तो बढ़िया बात आय जी कोंदा.. मोर तो मानना हे के अइसन आदेश पूरा देश खातिर निकलना चाही, तेमा लइका मन के मन म नान्हे उमर ले ही देश भक्ति अउ राष्ट्रीय एकता के भाव पनपय.
-हव जी सही आय.. आज के जाति, धर्म अउ बोली-भाखा के नॉव म घर-फोरवा राजनीति के दुष्प्रभाव ले लइका मनला बचाय बर ए ह कारगर साबित होही.
-सही आय जी.. नेताजी सुभाषचंद्र बोस के आजादी के आन्दोलन के बेरा म दिए गे ए नारा ‘जय हिंद’ ल जइसे आजादी के बाद हमर सशस्त्र बल मन द्वारा सलामी खातिर अपनाए गे हवय ठउका अइसने स्कूल के लइका मन के संगे-संग उहाँ जम्मो लोगन अभिवादन खातिर अपना लेवय.
