सुनना भैरा – गोठिया कोंदा “कोंदा-भैरा के गोठ” – सुशील भोले
जांजगीर फर्स्ट न्यूज़। अभी इहाँ के फैक्टरी मन म जेन किसम के विस्फोट होवत हे, तेकर ले अइसन जनाथे जी भैरा के हमर छत्तीसगढ़ ह पूरा के पूरा बारूद के ढेरी ऊपर बइठे हे।
सिरतोन कहे जी कोंदा.. चाहे बेमेतरा पिरदा के बारूद फैक्टरी के बात होवय, चाहे रायपुर गोंदवारा के फोम फैक्टरी सबके एके हाल हे, अउ सिरिफ अतकेच भर नहीं पूरा प्रदेश के चारों मुड़ा के फैक्टरी मन के एके स्थिति दिखथे, अइसे जनाथे के वो सबो म सुरक्षा उपाय के सरलग अनदेखी होवत हे।
सही आय.. अउ ए सब बर संबंधित विभाग के अधिकारी मन सबले जादा दोषी हें, जे मन सही ढंग ले जॉंचे-परखे बिना ही अनापत्ति प्रमाण पत्र दे देथें।
बिन राजनीतिक संरक्षण के ए सब संभव नइहे संगी.. दूनों के मिलिभगत के भरोसा फैक्टरी संचालन के लाइसेंस मिल जाथे, सुरक्षा इंतजाम के प्रमाण पत्र मिल जाथे, अउ बॉंचे-खोचे म वो सबो जरूरी जिनिस घलो मिल जाथे, जेकर ले अंखमूंदा होके फैक्टरी चलाए जा सकय।
जइसे इहाँ के संस्कृति ल बिगाड़े अउ भरमाए के बाहरी षडयंत्र चलत हे, ठउका वइसने ए धरती ल उजारे के घलो चलत हे।
