सुनना भैरा – गोठिया कोंदा “कोंदा-भैरा के गोठ” – सुशील भोले
जांजगीर फर्स्ट न्यूज़। -अब प्रायमरी अउ मिडिल स्कूल के लइका मनला हर शनिच्चर के इहाँ के संस्कृति अउ गौरव ले परिचित कराए जाही जी भैरा.. स्कूल शिक्षा विभाग ह अभी एक निर्देश जारी करे हे, जेकर मुताबिक शनिच्चर के बैगलेस डे रइही ए दिन कापी किताब ले पढ़ाए के बलदा स्थानीय अउ राष्ट्रीय तिहार, परब, महापुरुष आदि मन ले परिचित कराए जाही.
-ए तो बढ़िया बात आय जी कोंदा एकर ले लइका मन नान्हे उमर ले ही हमर परब तिहार ले परिचित होवत जाहीं, फेर अइसन तभे हो पाही जब वो स्कूल के गुरुजी मन खुद इहाँ के परंपरा अउ गौरव के अच्छा जानकर होहीं.
-तोरो कहना सही हे, काबर ते इहाँ अइसनो गुरुजी बहुत हें, जे मन इहाँ के मूल निवासी नइ होय के सेती कतकों परंपरा अउ गौरव ले अनचिन्हार बरोबर हें.
-हव सही आय.. अइसन गुरुजी मनला प्रशिक्षण दे खातिर घलो शिक्षा विभाग ल कुछू उदिम करना चाही तेमा छत्तीसगढ़ी के गुरतुर अउ गौरवशाली रूप के लइका मनला चिन्हारी हो पावय.
